1Cor 14 | ASO | STEP | Nemu' nene lingine evene' lutine ngimaa' monovolo' nene amuzo mili e'metilo. Ido' neloti' nene monoli'mi amuzo lingela nene ma dalone lisa amuzo milalo. Ne'mine niigi O'moso'mi veleti' gamazi li soto' igakumu' nene gilavo dizelive.

1 Corinthians 14

Mono' Gono Sikalahuli'mo Lehize-lidinguti' Dizo Minine' Nene O'moso'mi Veleti' Gamazi Li Soto' Iga' Gono Nene Dizo Neive Lo Paulo' Lo-ngimine'

1 Nemu' nene lingine evene' lutine ngimaa' monovolo' nene amuzo mili e'metilo. Ido' neloti' nene monoli'mi amuzo lingela nene ma dalone lisa amuzo milalo. Ne'mine niigi O'moso'mi veleti' gamazi li soto' igakumu' nene gilavo dizelive. 2 O'moso'mi Sikalahu' ne'mo vetine do lapa nomine' o-lengedavo gamazi notine atokuti' laa' nene lingine gilavo dizosa neine'za ne'mo evene' muki' nene ma hize ele' o-ngedamoloseinako a'mine gamazi notine atokuti' laa' nene dizo minamive. Lingine mulise milalizangu' nene evene' mali'mo gamazi nolo atokuti' liline' nene evene' gilamilizani' gamazi loloseinako a'mine liline' gamazi nene evene' lo-ngemamo O'mosovo' lo-imine' geleleseive. Ee, O'moso'mi Sikalahu' ne'mo hize ele' o-divosa evene' gilamilizani' gamazivo' loloseive. 3 Ne neiha evene' mali'mo evene' muki' gililizani' gamaziuti' nene O'moso'mi veleti' gamazi lo soto' ogo a'mine gamazi evene' nevo ne lo-ngemeline' ne'mo monoku' hize ele' o-ngedo lu'ine do ngi lo-ngedo do ngu' izeline' gamazi lo-ngemeleseive. 4 Izesu' eveneleti muliseu' nene evene' mali'mo gamazi evene' gilamani' nolo atokuti' mono' liline' nene ei' lulovo' hize ele' o-deleseiha evene' ma O'moso'mi veleti' gamazi evenelite gililiza no'ninguti' lo soto' ogo liline' ne'mo a'mida Izesu' evenele mulise minaveti lu'ine nene hize ele' o-ngedeleseive. 5 Naza giluvoni' lingine mukito' gamazi notine atokuti' mono' laa' ilizani' nene lamine' o neiha lingine O'moso'mi veleti' gamazi evene' muki' gililiza no'ninguti' li soto' iga' ilizani' ne'mo nene ivile' ogosa lamine' oloseive losa gele nouve. Izesu' zuhoti muliseu' nene ve mali'mo gamazi nolo atokuti' mono' gamazi liline' nene Izesu' evenele nene monoku' hize ele' o-ngedelingumu' ve losa gamazi nolo atokuti' mono' liline' nene do velepe' izidiniko ne'mo nene gamazi nolo atokuti' laa' ivesi ido' O'moso'mi veleti' gamazi lo soto' oga' ivesi nene lisihe' igi minasidine'za nolo atokuti' mono' liline' gamazi nene do velepe' izo Izesu' zuho mulise nene lo-ngemamiline' ne'mo nene gamazi nolo atokuti' laa' ive nene O'moso'mi veleti' gamazi lo soto' oga' ive ne'mo ivile' ogo mineleseive.

6 Neze zuhokizo, naza lengita ogo O'moso'mi suno' gamaziuti' ma lo-lengemamo ido' monokumu' gatine do ngolo' lo-lengedamo ido' O'moso'mi veleti' gamazi lo soto' o lengemamo ido' mono' monovo ma apize lengemamo haza gilamilizani' gamazi no'ne atokuti' a'mine a'mine gamazi lo-lengemeloni' nene monoku' nene ngelo hize ele' o-lengedamolosuve. 7 Ido' a'mine'mine ogo ve'inesi minamani' inite' polepe' ido' ngita nevo'mine initedunu' nama li ma bili guni amilizani' nene a'mine nama nene ma gilavete ne'mine nama ma nene nolive li ngeli gilamilisave. 8 Ido' biluvalite lovo di navo lovo di nave li ngimiseli di vilizangumu' di nene igi minilizave lo pikuli izeline' nene ize guno amivo evene' nete izeline' monovo nene gili guno ami hazamu' noizeleseive li gili ngeli di nene igi minamilisave. 9 Ido' a'mine'mine ogo lingine notine ato' evene' gilamilizanguti' lilizani' nene gamazi lilizani' monovo nene evene' ingine gilamavo hazamu' mehe'nida li huli huli' ilisave. 10 Misubo ato ato' mukiku' nene evene' laa' nani' no'ine nene nanike' neve. Naza gelamuha muki' goloso neive. Ido' a'mine gamazi'ine mukikuti' nene monovo've nomine' gamazi hamokisi ma minamo noloseive. 11 Minamoloseine'za ve mali'mo gamazi ato' nolouti' ma nolivo naza ma gelamoloni' eze nene golo mala ve lolo' ogo do aka o-nidamivo nazasi nene a'mine'mine ogo golo gohila ve lolo' ogo do aka o-damuvo minelesusive. 12 Ido' lingine notine atokuti' mono' lilizani' nene evene' monoku' di aka i-ngidamilisanako lengitasi nene monovo a'mine'mine ogo neive. Nemu' nene lingine monoli'mi amuzo ma dalisa amuzo mili nilizani' Izesu' evenele zuho nene monoku' hize ele' o-ngedelone' amuzo dalone li hize ele' i-ngidilisa amuzo milalo. 13 Nemu' nene ve ma nolo atokuti' mono' gamazi lo soto' oga' olo ma nene alinge' do velepe' izo evene' gililizado' lo-ngemelingumu' nene do velepe' izo lo-ngemaa' amuzomu' nene O'mosola lilive. 14 Ido' nene nanitekumu' ve. Lingine gili'nalo. Laza note atokuti' O'mosola ma lo mineso' nene O'mosola nadive nolube monovo've gelamo gopo nolunivo leli' Sikalahute ne'movo' nene loloseive. 15 Nemu' nene nadi' olone. Sikalahute'mo O'mosola nolivosa gate ne'mosi gele hehe nolivo vetedunu' lolone' nene lamine' oloseive. Ido' Sikalahute'mo mono' nama nolivosa gate ne'mosi gele hehe nolivo vete nedunu' loso' nene lamine' oloseive. 16 Ido' ne'mine amolone' nene lengikuti' ve malike Sikalahuka nedunukovo' gamazi noka atokuti' O'mosola lo opo'ni noliliba a'mine noka nene gilamilizave ingine liline' gamazi gilamilizani' ne'mo monoku' hize ele' o-ngedamolosainako nemu' nene gamazi lo osu' laanivo ingine ne'mino minivo li ngeli lamilisave. 18 Ido' O'moso'mi Sikalahuli'mo gamazi no'ne atokuti' laa' amuzo nene vauve elo lehize-nidivo lengi' mukito' nene lingivile' ogosa laa' nouvoni' nemu' nene O'moso opo'ni laa' nouve. 19 Ne neiha Izesu' eveneleti muliseu' gamazi nene ato' no'neuti' gamazi ha'na ha'na golososi lo-ngemeloni' nene monoku' ngelo hize ele' o-ngedamolosuha no'ne atokuti' lamo ga'ne gele hehe lo mono' lo-ngemeloni' nene ga'ine do ngolo' lo-ngedelesuve. Ee, gamazi li'nibesi nevo ma lo-ngemeloni' nene ga'ine ha do ngolo' lo-ngedelesuvonako nemu' nene gamazi no'ne atokuti' lo-ngemamo ga'ne gele hehe lo mino gililizani' gamaziutikovo' lo-ngemelesuve lo gele nouve.

20 Neze zuhokizo, lingine gatine gili guni ami izipe namuno lili' igi minani' nene hulilo. Ne neiha goloso inite' nene izipe namuno ngomolite nene ngeli damilisanako linginesi goloso inite' nene dami izipe namuno ne'mini minilisani'za nemu' lamuve. Lingine gatine gililizani' nene izipe namuno gatine gilami evene' lodivete gili vevesaa' nani' ne'minisa lingine gatine gili vevesi minilo. 21 Mono' godolou' nene O'moso'mo ezemu' gili ele'vole' amave Zuda vemu' line' gamazi ma ti' li gizi nizani' ma neive:

Naza lokuvo golo malati' aleve ingine igi
engi' ato' no'ninguti' mela aleve gamazi li-ngimilizaha nesi nene
mela aleve neze gamazi gili damilisave.
22 Ido' lingine gilani' nene O'moso'mo lengikumu' nene lamine' gelosa gamazi note atokuti' laa' monovo nene do soto' o-ledave li gilaa' nahe. O'ove. O'moso'mo ezemu' gili ele'vole' amavemu' mulunou' goloso giline' ne'mi monovo nene ngelebizelesa gamazi no'ine atokuti' laa' monovo nene engitasi do soto' ine' nene a'mine mono' godolou' minine' gamazi mauti' nene ningo gelelesune. Ne neiha O'moso'mi veleti' gamazi laa' monovo nene ezemu' gili ele'vole' amavemu' nevoba ezemu' gili ele'vole' avemu' nene eze monovo ngelebizelesa do soto' o-ngedaa' neive. 23 Ido' nemu' nene Izesu' evenele lingine di nubo igi ato ato' notinguti' mukito' nilavo evene' ma mono' monovo olihe gilamave nizahe ido' O'mosomu' gili ele'vole' amave heta ato' ve nizahe ingine nene a'mingu' dizi nizavo lingine ato ato' notinguti' li nizavo ingine gili nemu' nene lingine negi hizi nizave li lilisave. 24 Ido' ato ato' notinguti' lami mukito' O'moso'mi veleti' gamazi li soto' soto' igi nizavo mono' monovo olihe gilamave nizahe ido' O'mosomu' gili ele'vole' amave heta ato' ve nizahe engikuti' ve ma aza lengi' muliseu' dizo mono' geleline' nene mono' lilizangu' monovo goloso oga' noilido' ne'mine oga' monovo nene goloso ve li li soto' soto' ikevo lulou' hizo do ote-davo monovo've goloso oga' ine' nemu' geleline' ne'mo lihime'vemu' li soto' i-di goni' i-dani' geleleseinako 25 a'mine ve'mi lulou' monovo goloso lamine' haleko minine' ma nene soto' oloseive. Ne'mine ogavo aza nene O'moso gubu' ize emo golo hizo ongo O'moso nene lengi' vovotingu' neive lo loloseive.

26 Ido' neze zuhokizo, ne'mino neine' nenako neloti' nene nadi' olone. Lingine monoku' igi di nubo ilizangu' nene mali'mo mono' nama lavo ma ne'mo mono' monovo ma lo ngolo' lo lo-lengemavo ma ne'mo O'moso'mi suno' gamazi ma lo soto' ogo lo-lengemavo mali'mo nene gamazi nolo atokuti' lavo mali'mo a'mine line' gamazi nene do velepe' izivo ne'mine igi minilizani' ne'mo nene evene' monoku' do amuzo molo-ngedeline' inite' ilisanaze. Ne'minevo' ilo. 27 Ido' ve ma ingine ato' no'ninguti' mono' lili ma nene sitalitise he sito hamolite he a'ne'minetevo' lilisave. Mukito' hamoku' molo hite hite' igi lamilisave. Ga loke na loke li nilasivo mali'mo a'mine gamazi lilisine' nene monovo do velepe' izo lo-lengemelive. 28 Ido' ve mali'mo nolo atokuti' mono' lo-lengemelesa neivo a'mine lo-lengemeline' gamazi nene do velepe' izo lo-lengemelive ma minamivo ma a'mine ato' nolouti' mono' lolosa ive nene Izesu' zuholiti muliselo' nene gamazi lamo haza mino ei' luloukovo' O'moso lo-emo minelive. 29 Ido' O'moso'mi veleti' gamazi nene sitape sito hamohe ne'minetevo' ga loke na loke li nilavo evene' linge ma ingine nene lamine' lilizahe di zovo' izi lilizahe li gapepe' igi gili minilisave. 30 Ido' ve mali'mo O'moso'mi veleti' gamazi lo soto' ogo nolo-lingimivo gapepe' igi mulise mili minilizaveuti' mali'mi lulou' O'moso'mi Sikalahu' ne'mo mono' gamazi gosoho' ma molo-davo ma nene gomu' gamazi lo-lengemo minive ma nene lite' lo lo-lengemo osu' lo haza neivo mono' gamazi gosoho' lulou' limive ne'mo lilive. 31 Lingine mukito' hamo hamo' li-limi' limi' avo mukito' O'mosomu' gele veveso monoku' amuzo molaloningumu' ve li O'moso'mi veleti' gamazi nene ga loke na loke li hamo hamo' ha lo soto' ilisanako nemu' nene gamazi lami gopo gatine gilami haza nizavo mali'mo nene ha lilive. 32 Ido' O'moso'mi Sikalahu' ne'mo lute do ote-ledaa' neine' nenako gamazi nololone' nene geto lo osu' lamolosune li lingine lamilo. O'moso'mi veleti' gamazi li soto' iga' ave engi' lu'nido' nene angisevo' gizebo i nizanako nemu' ve ma aza gamazi lo minelinguti' nene hulo ha neivo mono' gamazi gosoho' lulou' lemavo lolosa ive ma'mo nene lilive. 33 Ido' ne nanitekumu' ve. O'moso nene inite' do gopo' napa ogali'mi meleho minamo aza nene lute do hamo' ogo hongu lo minali'mi meleho ne neive.

Nemu' nene lingine mono' gililisa mulise milalizangu' nene lingine monoku' igi mili iliza monovo nene di gopo'napa ami mini mono' lilizangumu' nene kulu keleka lami ha ge loke ne loke li lilizave. Ido' vene' nene gamazi lamilizave lo o'ove lo none' nenako nemu' vene' ingine Izesu' eveneleti mulise'ine mini'mi monani' mukiku' nene gamazi lami haza minaa' adi'mine igi lengitasi vene' nene gamazi lami hazavo' minilizave. O'moso'mi lou' gamazi'mo lido' igi vene' ingine gelekelekovo' igi minilizave. 35 Ido' Izesu' zuho mulise neti ve'nido' venelite gamazi lilizani' nene lovozo oloseinako nemu' nene vene' ingine inite' mamu' longo' ilisa gili ma nene numu'nida vi mini vanahosi angisevo' minilisingu' nene longo' o-davo li gili ha gele igi gililisive. 36 Ido' lingine vene' gamazi lamilizave lo luvoni' nemu' e'metamilizani' nene naza ne'mine lo noluve: O'moso'mi gamazi nene lengikuti' soto' ogo minine' nehe. Ido' lengikovo' api' igi gilani' neve. O'ove. Nemu' nene leli' gomu' Izesu' zuho lolo' une' nene livile' igi monovo gosoho' di soto' amilo. Lengi' nene leli' gomu' Izesu' zuho lolo' une' nenaze. Le'metilo.

37 Ido' lengikuti' ve malite engi' nene O'moso'mi veleti' gamazi lo soto' oga' unive none ido' Sikalahutati' amuzo do minunive none lilizave nene neni' gamazi mene gizo nolingimuvoni' nemu' nene Guvelesi ve'mo lo huko-lidine' gamazi ve li gili minilizave. 38 Ido' Guvetesi ve'mi gamazi ve lo nogize-lingimuvoni' gamazi mene ve mali'mo gele hulavo ma nene ezemukisi gele hulo aza nene O'moso'mi veleti' gamazi lo soto' oga' amuzo damive lolone.

39 Neze zuhokizo, gamazi meuko luvoni' nemu' nene O'moso'mi veleti' gamazi li soto' ilizangumu' amuzo milalo. Ido' evene' ma no'ine atokuti' lilizangumu' nene mo mudise o've li-ngidilizave lo lamuvoni'za 40 lengi' mulise milalizangu' inite' igi mili minilizani' muki' nene vo gopo' napa amo laminekovo' o-do vo miniliho losa noluve.